يوميات بابا عمر وماما ساره


الحلقه الثانية




قال عمر :

لا أدري لماذا تذكرت فيلم الحفيد والأب يبكي وهو يشتري لوازم الولاده من مغات ودجاج وخلافه وأنا مع حماتي نشتري لوازم البيت والمغات وو و .... مع طبعاً الهمز واللمز من حماتي إننا مفروض نكون اشترينا كل الحاجات دي قبل الولاده ..... وأنا أتحجج بأن ساره ولدت قبل ميعادها وطبعاً لم أقل إننا لم نملك ما نشتري به جناح كتكوت !! واشترينا كميه من الدجاج تكفي حي شبرا وطن مغات وحلبه وسكر وعسل وأرز ووووووو ....... وكدت أبكي أنا الآخر وأترك حماتي وحدها وأتعلل أن عندي مشوار لليونسكو !! لولا أني وجدتها وقت الحساب تخرج مبلغاً ضخماً وتحاسب هي ... رقصت من السعاده وأنا أقطب جبيني وأقول : ليه كده بس يا طنط ؟ طيب لو ما كونتيش تحلفي !!!!!!

قالت ساره :

إيه يا جماعه هو أنا وحش ؟ ازاي آكل فرخه كامله لوحدي ؟ وكمان مسلوقه ؟ لا بجد حرام !! ولم تجد توسلاتي صدي أمام روسيا وأمريكا أقصد ماما وحماتي ... أخيييراً أجدهم متفقين في شيء منذ زواجي ألا وهو ضرورة جعلي كالدرفيل بعد الولاده من كثرة الطعام ... فأجدني في الصباح مضطره إلى شرب كوب كبير جداً من المغات الذي تعلوه طبقات من السمن البلدي والمكسرات والذي يكفي وحده إلى جعلي شبعانه لمدة شهر .... ويتبعه كوب كبير من الحلبه بالعسل الأسود مش عارفه ليه وكل ما أبدأ بالاعتراض تجتاحني نظرات ناريه من الطرفين تجعلني أبتلع الكوب والملعقه أيضاً ..... والمشكله إني مطالبه بشرب كميات لا نهائيه من المغات والحلبه طوال اليوم .... وعندما أري الكوب الميمون يتجه نحو فمي يكاد لسان حالي يقول : اشربي يا شابه ماحدش بياكلها بالساهل !! ووقت الغداء أجدني مضطره إلى أكل فرخه ضخمه في حجم الديك الرومي وحدي لا أعرف لماذا ؟ ومثلها في العشاء !!!!! لا أعرف لماذا يظنون إن من تلد لابد أن تتحول إلى فيل بزلومه ؟ فينك يا عمر ؟!!!!!!!!

قال عمر :

سبحان الله نفس الهجوم اللي هجم علينا بعد الزفاف هجموا تاني بعد الولاده !!! الزيارات ليل ونهار بس المره دي الوضع مختلف إن حماتي هي اللي بتقوم بخدمتهم والنساء يدخلون لساره في حجره النوم وأنا أتدبس مع الرجاله في الصالون .... ولازم الكل يشرب مغات ليه ولدوا هم كمان ؟ بس بصراحه المره دي فيه نقوط كتير ليحيى ... بصراحه هو وش الخير علينا كفايه إنهم وافقوا علي موضوع شغلي الجديد في نفس يوم ولادة يحيى ... صحيح سبحان الله عمري ما تخيلت معني الآيه ( نحن نرزقهم وإياكم ) بالشكل ده .. يعني ربنا قدم رزق الأطفال علي رزق الأباء .... الحمد لله ربنا يخليك لينا يا يحيى .....

قالت ساره :

جايبه الوحاشه دي منين يا ساره ؟! كلمه سمعتها من كل من زاروني واغتظت لها جداً وكنت أغضب وأكاد أقول محدش يقول علي ابني وحش ده زي القمر ....... عندما غمزت لي أمي أن الكل لازم يقول كده علشان لو البيبي تعب لا قدر الله مانقولش إنهم حسدوه !!! طيب ما يقولوا انه جميل ويقولوا ما شاء الله !!!! لا والأغرب إن ماما كانت تأمرني أن أتظاهر بالإعياء الشديد وإني شفت الأهوال في الولاده علشان برضه الحسد !!! وكنت أري نظره ناريه منها لو وجدتني ضحكت بصوت عالي أو اقترحت الخروج من غرفه النوم للجلوس مع صديقاتي فتعيدني هذه النظره إلى النوم علي السرير والتظاهر بالكساح !!

قال عمر :

آآآآآخ نفسي الضيوف دول يمشوا علشان أنام شويه ... والبيت محتاج فليبينيه علشان يرجع لحالته الطبيعيه وطبعاً علشان حماتي هي اللي حاترتب البيت ما ينفعش أطنش ولازم أساعدها دي مش ساره علشان أسيبها تعمل كل حاجه وأنا سلطان زماني !! لا والمشكله كمان إن بعد حمله الترتيب القاتله لن أستطيع النوم في غرفة النوم كالمعتاد ..... يكفيني سهرة امبارح والحفله اللي كان نجمها الأوحد الأستاذ يحيي من سيمفونية صراخ متواصل حتى الفجر وعزف منفرد من بكاء ساره لفشلها في إسكاته ....... وكنت أنا المتفرج الوحيد في هذه الحفله وحاولت المساعده ولكني فشلت بالطبع فأخذت البطانيه وسلمت أمري لله ونمت في الصالون !!! طيب أنا في أجازه حالياً حتى الأسبوع القادم عندما أبدأ العمل في الشركه الجديده ..... ودول ناس لازم أكون فايق جداً معاهم حاعمل إيه في الحفلات المسائيه للأستاذ ؟ ربنا يستر ....

قالت ساره :

آآآه أخيراً الضيوف مشيوا خلاص ... نفسي أنام ... أنا بقيت باعتبر النوم ده حاجه كده زي الحلم العربي !! البيه طول النهار نايم وطول الليل صاحي مش فاهمه ليه ؟!! بجد بابقى خلاص حارمي نفسي من البلكونه علشان ينام وبرضه مافيش فايده ... وطبعاً عمر مش عارفه أصلاً أشوفه من ساعة الولاده علي طول مطرود من الأوده ..... يا ربي كل الأمهات بيتعذبوا العذاب ده ؟ طيب والأم اللي بتصحى بدري علشان شغلها بتعمل إيه ؟ آآآآه الحفله ابتدت جايه يا يحيي باشا !!!!


********************

الى اللقاء مع الحلقه القادمه

هما كمان خلفو هههههههههههههه
الف مبروك عليهم بجد لولولولى

تسلمى يا احلى سوسو مجهود جبار

تسلم يدك ساااارة

بدوفيق ان شاء الله

ما شاء الله عليكى ربنا يحميكى يا رب وييسر لك الامر

موضوع جميل خيتى تســـ ايدك ــــلم