شـكــ وبارك الله فيك ـــرا لك ... لك مني أجمل تحية .

يوميات بابا عمر وماما ساره


الحلقه الرابعة




قال عمر :

استيقظت في الصباح أنا وساره لأول مره بدون الحفله المسائيه للأستاذ يحيى واضح إن مفعول الحمام والقرآن طول الليل جبار معاه .... الحمد لله أول ليله ساره تنام من غير قلق واستيقظت مش مصدقه نفسها إنها نامت مره واحده زي الناس الطبيعيه وهمست لها :
صباح الخير يا حبيبتي نمتي كويس ؟
فردت علي همسا هي الأخرى خشية إيقاظه : ياااااااااااه ده أنا مش مصدقه نفسي إني نمت كل ده من غير ما يحيى يصحى .....
أنا : ربنا يخليه ليكي يا حبيبتي يالا لبسيه حاجه ثقيله علشان آخده معايا ...
فردت ساره برعب : علي فين ؟
أنا : يووووووووووه يا ساره هو إحنا حانتكلم في الموضوع ده تاني ؟ إنتي عارفه علي فين .
فردت بفزع : لا أرجوك يا عمر بلاش النهارده استني شويه لحد ما يكبر ...
فرددت عليها بعطف : بصي يا ساره يا حبيبتي السنه عن الرسول صلي الله عليه وسلم إن المولود في اليوم السابع بيحلق شعره كله والأب يتصدق بوزن الشعر وزن مساوي من الفضه وكمان إن يتعمل عمليه ختان للمولود في اليوم السابع زي ما الرسول عليه الصلاة والسلام عمل للـحسن والحسين .... عاوزانا نخالف السنه ليه ؟
فردت بتضرع وكادت تقبل يدي : مش حاخالفها ولا حاجه بس احسب وزن الشعر يكون كام واتبرع بأكتر منه وبلاش تحلق له وأجل موضوع الختان شويه لحد ما يكبر أرجوك يا عمر علشان خاطري .
فرق قلبي لرعبها علي وليدها ورددت بحنان : ما تخافيش يا حبيبتي مش ممكن فيه حاجه في الدين بتؤذي الوليد ويعني هو مش ابني ما هو أنا كمان خايف عليه .
فبكت بالفعل وهي تخبرني من بين دموعها : لا يا سيدي إنت ما تعبتش فيه زيي ولا شفت الموت في ولادته وإنت خسران إيه يعني ؟
فضممتها إلى وقلت لها : إحنا اتفقنا إننا حانربيه تربيه إسلاميه من أول يوم في عمره حاترجعي في كلامك ولا إيه ؟
ساره : ........................

قالت ساره :

ماما وحماتي مشغولين بتوزيع لحم العقيقه التي ذبحها بابا في الصباح علي الفقراء والبيت كله في حركه دائمه وأعلنوا حاله الطواريء في المطبخ لأعداد وليمه السبوع وطهي بقية العقيقه وبقية أخواتي وأخوة عمر يعلقون الزينات ويرتبون الشموع استعداداً للمساء عندما يأتي كل الأهل والأصحاب ....... وأنا غائبه عن كل هذا وأكاد أري أشباحاً وقلبي وعقلي مع ابني وهم يقطعون جزءاً من جسده آآآآآآآآآه كلما أتذكر هذا لا أتوقف عن البكاء ..... وكل دقيقه أتصل بعمر علي الموبايل حتى مل مني وأغلقه نهائياً ... وأخيييراً جاء هو ووالده ومعهم يحيى وللغرابه وجدته نائم وأخبرني أن الطبيب أعطاه مسكن وسينام فتره وأن الموضوع تم بسهوله وفي دقائق .......
كدت أقتل عمر وهو يتكلم بهذه البساطه .... صحيح الرجاله قلبهم حجر !! وحضنت يحيى بقوه لأعوضه قسوة أبيه !! وخلعت عنه الكاب لأجده أصبح شبه إبراهيم نصر !! حلقوا له شعره بالموس وأصبحت رأسه ما شاء الله زلطه ............ وقبل أن أصرخ في عمر وجدته هرب من أمامي !! أخذته إلى حجرة النوم وأخذت أبكي بلا توقف ...... آه لو أعلم أن الأمومه متعبه بهذا الشكل لما كنت تزوجت من الأصل ...... وأفقت علي يد عمر تربت علي كتفي فدفعته بقوه وعلا صوتي وأنا أصرخ فيه :
إنت بجد قلبك حجر ولا يمكن حاسيبه معاك تاني أبداً أبداً .
فرد بهدوء وكأنه يكلم مجنونه : خلاص أوعدك المره الجايه مش حاوديه لأبو رجل مسلوخه تاني ... مش تعقلي كده يا ساره ؟ ما الولد كويس الحمد لله .
فرددت بعصبيه : استني لما يصحى وشوف حايعمل فيا إيه ..... حرام عليك والله .
فرد بحنان : خلاص يا ستي لما يصحى أنا اللي حاسكته اتفقنا ؟ وبعدين مش تشوفي أحنا جبنالك إيه أنا ويحيى بمناسبة الولاده والسبوع ؟
فرددت بعناد : مش عاوزه منك حاجه .......
فلم يرد علي وأخرج كارت صغير مكتوب عليه بخطه ( أنا بحبك يا ماما الإمضاء يحيى .... )
فلم أتمالك نفسي وابتسمت وأحسست أن أبني كبر فعلاً وهو اللي كتب بخطه ولم أنتظر حتى فاجأني عمر بعلبه أنيقه أخرج منها خاتم رائع به فراشات كثيره شبيه بالخاتم الذي أهداه لي في قراءة الفاتحه ..... ياللرقه .... وخجلت من نفسي ومن عصبيتي ورددت بصوت هامس :
ربنا يخليكوا ليا يا رب .........................

قال عمر :

جلس جميع رجال العائلتين في الصالون بعد الغداء الدسم والتهام العقيقه ساكنين خاشعين في استماعهم إلى صوت المقرىء الذي أتيت به ليتلو آيات الله بعد العصر والكل تعجب من الفكره .... سبحان الله لماذا القرآن لدينا والمقرئين مرتبط فقط بالموت والمآتم ؟ ألا نتذكر الله إلا في الحزن ؟! ورغم استغراب الكل إلا إنني وجدت الجميع سعداء ومنتشيين من حلاوة صوت الشيخ وأثنوا علي في الفكره ....... وقطع سكون البيت صوت يحيى وهو يصرخ بشده لم أسمعها منه من قبل فاستأذنت وجريت له فوجدته يبكي حتى تحول وجهه للون الأزرق وساره حالتها لا توصف فأحسست بالذنب الشديد ولكني تمالكت نفسي وأخذته منها وأعطيته نقط الدواء المسكن وأخذت أهدهده وأقرأ له القرآن في أذنه حتى نام أخيراً ........

قالت ساره :

بدأ الناس والأصحاب يتوافدون وأنا عيناي متورمتان من البكاء ونهرتني ماما عندما رأتني في هذا الشكل وجعلتني أبدل ملابسي بالأمر ...... وجاءت حماتي واختارت لي طاقم سواريه لا أرتديه إلا في المناسبات وهمست في أذني أن الناس لابد أن تراني عروس اليوم .......... ودقائق قليله وأصبح البيت يعج بالناس لا أعرف من دعى كل هؤلاء ؟!! وخفت علي يحيى من هجوم الجميع عليه وأخذته في حضني لا أفارقه وأنا أقرأ المعوذتين باستمرار ..... وانطلق صوت الأطفال يغنون أغاني السبوع الجميله وأضفوا بهجه علي البيت وشعرت إني في فرح حقيقي ........ ولحظات وانطفأت الأنوار وأمسك الجميع الشموع كباراً وصغاراً وأخذوا يغنون ( حلقاتك برجالاتك ) وأمي تنثر الملح فوق رؤوس الجميع ومعه السبع حبات والتي علمت أنها عاده قديمه أعتقد فرعونيه وهي مكونه من القمح والذره والحلبه ووووو وكل واحد من هذه الحبوب يرمز لشيء يتمنون أن يكون في حياة المولود مثل الخير والرخاء ووو ...... وهددتني ماما أن لابد أن تظل هذه الحبوب مع الملح في أرض الشقه وأمام المنزل أطول فتره ممكنه ولو كنستها احتمال تبلغ عني البوليس !!

قال عمر :

ياااخبر أبيض إيه الفزع ده ؟!! ماما بتدق الهون في ودان يحيى بكل قوه علشان لما يكبر ما يخافش من الأصوات العاليه بس أنا اعتقد أنه بعد الدق ده مش حايسمع لا عاليه ولا واطيه !!! لا وكمان حطينه في غربال وبيهزوه مع مجموعه من النصائح اللي تودي في داهيه ( اسمع كلام أمك ..... اسمع كلام جدتك - طبعاً - ما تسمعش كلام أبوك !! ) حايفسدوا أخلاق الولد من دلوقتي !!!

قالت ساره :

وجاء وقت البخور وامتلأت الشقه برائحته الزكيه وجعلوني أمر من فوقه وأنا أحمل يحيى 7 مرات وعمر لا يتوقف عن التقاط الصور لنا وكأننا في فيلم سينمائي ..... بس بجد رغم إن كل العادات دي مش إسلاميه لكن لا يوجد بها ما يضر بل أعطتنا بهجه وذكري لن تنسي ...... وأخذت ماما يحيى وأخذت تلف به كل حجرات الشقه وكأنها تريه بيته .... وصرخت عندما وجدتها تخرج به إلى البلكونه في هذا البرد الرهيب ..... ولكنها أصرت ووجدت كل الجيران واقفين في البلكونات وكأنهم يعلمون أن ماما لازم حاتطلع البلكونه .... يا ربي كل الأمهات شبه بعض !!! ولم يكتفوا بالبلكونه ولكنهم خرجوا به إلى خارج الشقه ووراءهم طابور الأطفال بالشموع ونزلوا به عده طوابق وكل شقه يصلون إليها تستقبلهم الأمهات برش الملح والزغاريد أيضاً ..... وأخذ الجميع يأخذون علب السبوع ويعطوننا الهدايا وأغلبها والحمد لله مبالغ ماليه ....... ولم أعد أعرف أين يحيى في هذا المولد .. وأخذت أبحث عنه في كل مكان .. حتى وجدت يد تمتد في الزحام لتحتضن يدي ووجدته عمر يقول لي : ألف مبروك يا عروسه !!!!!


********************

الى اللقاء مع الحلقه القادمه

يوميات بابا عمر وماما ساره


الحلقه الخامسة




قالت ساره :

مر ثلاث أسابيع علي ولادتي يحيى ..... زاد وزنه قليلاً واستدار وجهه وظهرت ملامحه أكثر .. عمر يصر انه شبهه وأنا أحلف أنه شبهي أنا !! وأصبح يعرف صوتي وعندما أناديه أو أتحدث بصوت مرتفع بجواره ينصت ويتوقف عن البكاء ..... وماما بتقول لي انه بيعرف رائحة أمه من يوم الولاده سبحان الله ! وطبعاً لا علاقه له بـعمر أبداً لأنه حتى الآن يعجز عن حمله بصوره صحيحه ويكتفي بملاعبته وهو علي كتفي لدقائق قصيره !! وده لأن أنا نفسي باشوفه طول اليوم لساعات قليله علشان الشغل الجديد ........ وأحيانا يأتي ولا نراه !! أنا سعيده جداً بـيحيى وأشعر انه أعطى حياتي طعماً جديداً وأستعجب كيف كنت أعيش بدونه لكن في نفس الوقت أشعر بشعور رهيب من الحزن والاكتئاب والرغبه الدائمه في البكاء لأقل الأسباب وأحيانا بدون أسباب ...... لا أعرف سبب رغبتي الجديده في تذكر كل الأحداث الحزينه التي مرت علي وتخيل ما يمكن أن يحدث من سوء لي ولـيحيى وعمر ... وعندما يتعطف علي يحيى باشا ويسيبني أنام أحلم أحلام سيئه جداً بأني دائماً بافقد يحيى وووو ...... أحياناً أرفع سماعه التليفون كي لا يكلمني أحد علي الإطلاق حتى ماما ..... حتى الأكل باكل غصب عني ولا اشعر بمذاق اي شئ ولا رغبه عندي أن استمع إلى عمر وهو يحكي لي كل يوم عن عالمه الجديد بمنتهي الحماس وأنا أسمعه وكأني من عالم آخر ..........

قال عمر :

يا خبببببببر !!! ده الواحد كان مدفون في شركتي القديمه !! ده أنا كنت بامثل إني باشتغل مهندس والظاهر إني كنت شيخ غفر !! الشركه الأجنبيه الجديده شغلها من نار مافيش دقيقه دلع ولا رغي في التليفون ولا شرب شاي وسندويتشين فول !! ولا مجال للخطأ أو التهاون لأنهم يطبقون في العمل نظام الأفضليه فقط ولو تهاون أحد لا مكان له ويستبدل بمهندس غيره في يومين علي الأكثر ...... وميعاد تسليم المشاريع لا يمكن التأخير فيه إلا لو مت مثلاً !! والأكثر انك فقط لا تؤدي العمل المطلوب منك فقط ولكن طول الوقت مطلوب منك أن تطور نفسك وتطور الشركه بأفكار ومشاريع جديده تساعد علي سير العمل وتطور الأداء وهذه الأفكار يؤخذ عليها نقاط توضع في ملف كل مهندس وعلي أساسها تتم ترقيته علي قدر عمله ........ وليس عن طريق الأقدميه أو عن طريقنا المفضل أن من ينقل كل أخبار الموظفين ويكون جاسوس عليهم يكون هو حبيب المدير وأهم موظف في الشركه حتى لو كان لم يدخل حتى محو الأميه !!!!!!!

قالت ساره :

ماما قالت لي إن الغم اللي أنا معيشه نفسي فيه سببه اكتئاب ما بعد الولاده وده بيحصل لأمهات كتير ..... استغربت جوايا وقلت ليه ربنا يدينا نعمه زي الامومه ونكتأب ؟ حاولت أقرأ في الموضوع ده ودخلت علي النت لقيت انه بيحصل من اضطراب الهرمونات بعد الولاده لأنها بتهبط فجأه بعد ما كانت مستقره طول شهور الحمل ....... واترعبت لما لقيت حالات في اوروبا وأمريكا دخلوا حاله مرضيه من الاكتئاب وقتلوا أولادهم ومنهم انتحروا !!!! أعوذ بالله ربنا يستر ........ لا لازم أحاول أخرج من الحاله دي قبل ما أتجنن !! حاحاول اسمع قرآن مادمت مش قادره أقراه ..... أحاول أقرا الجرايد تاني أو أروح للكوافيره اللي نسيت عنوانها فين !! بس والله غصب عني كل ما باشوف شكلي في المرايه وان وزني زاد شويه باعيط ولما باحس إني معزوله عن العالم وكل حياتي داخل الكوافيل والرضعات والبكاء المستمر باكتأب ......... ولا شعورياً باحس إن عمر هو السبب في كل اللي حصل لي فبابعد عنه أكتر وأكتر !! وهو كمان مشغول جداً في شغله ولا يفكر أن يشاركني في تربيه يحيى ....... حتى إنه ساب أودة النوم وأصبح ينام لوحده في الغرفه الصغيره طبعاً من كونشرتو آخر الليل للباشا يحيى !! وعندما أغضب وأطالبه ألا يتركني وحيده يتعلل بأنه لازم ينام كويس علشان يعرف يشتغل الصبح لأن الناس دي ما بتهزرش !!! طيب وأنا أعمل إيه ؟ هو ابني لوحدي ؟ ده غير إني أصلا مش بأنام طول الليل والصبح مطلوب مني إني أراعي البيت وانضف وأطبخ غير المعارك اليوميه لـيحيى والتي لا تجعلني أجد وقت لانجاز كل الكوارث اللي ورايا دي ..... وبجد حاسه إن أنا وعمر بعدنا عن بعض كل واحد في أوده وبينام بدري لأنه بيرجع متأخر من الشغل الجديد وأنا أفضل وحيده ...... ومش عاوزني أكتأب ؟ !!!!!

قال عمر :

خلاص الظاهر شهر العسل خلص خلاص وحايبتدي الجواز الأصلي !! مش عارف أتكلم مع ساره ولا نقعد مع بعض زي زمان يا إما نايمه لأنها سهرانه طول الليل مع يحيى يا إما بتجري تحضر له رضعاته أو بتغير له يا إما مكتأبه ومش عاوزه تتكلم خالص !! وأنا بجد مش عارف أعمل إيه ؟ ومش عارف أساعدها ازاي يعني اسيب شغلي وأقعد أرضع أنا يحيى ؟ !!! بجد سعيد جداً بأني بقيت أب ولو خيروني بين كنوز الدنيا وبين يحيى أختار ابني طبعاً !! بس حاسس إني خلاص بقيت في المرتبه التانيه عند ساره ...... والله وارتكنت علي الرف يا عم عمرر !!!!!!!!


********************

الى اللقاء مع الحلقه القادمه

يوميات بابا عمر وماما ساره


الحلقه السادسة


قالت ساره :

النهارده يحيى باشا كمل شهرين بالتمام والكمال خلاص بقى راجل قد الدنيا ومحدش عارف يكلمه .... بقى بيضحك لما ألاعبه بجد بجد ابتسامته لا يمكن تتوصف بتمسح عنى أي تعب أو ألم ........ والظاهر هو عارف كده بيعمل كل كارثه والتانيه وبعدين يبتسم لي كأنه بيدينى رشوه !!!.... آآآآآآآآآه واضح إن جينات الرجوله بتتخلق من بدري أوي !!! لا وواضح انه حايبقى شقي جداً عاوز يرفع دماغه على طول علشان يعرف إيه اللي بيحصل في الدنيا من وراه !! ولا يقبل أي تأخير في طلبات سيادته ولو لدقيقه واحده بيكون كل الشارع سمع صوتنا !! بس بجد كل يوم بسأل نفسي ازاي كنت عايشه في الدنيا من غيره ؟؟؟؟ صحيح إني نسيت النوم والراحه والخصوصيه بس سبحان الله ربنا بيعوض كل ده بكنز خاص اسمه الأمومه ......

قال عمر :

المدير عاوز تصميم المشروع الجديد جاهز في أقل من شهر حتى لو اضطريت إني أبات في الشركه أنا وزمايلي مش مشكله المهم يتسلم في ميعاده بالثانيه ...... أمال ليه إحنا في شركاتنا العربيه كل حاجه ماشيه بالبركه ؟ وعادى جداً إننا نسمع عن مستشفى مثلا بيتبني في عشره وعشرين سنه كمان ؟ طبعاً كل ده مش وقت للبناء بس بيشتغلوا يوم ويريحوا شهر !!! بس فعلاً مش قادر على ضغط الشغل حاسس إني مطحون وكل حاجه عندي بالدقيقه والثانيه ..... وأنا كمان في مرحله إثبات الذات في الشركه وغير مسموح لي بأي خطأ أو تهاون .... وللأسف جو البيت لم يعد مشجع زى زمان ..... ساره طول الوقت عينيها بتتهمني بالتقصير ناحيتها وناحية يحيى .... رغم إنها لم تصرح بده بس أنا باحس بيها ... لكن أعمل إيه بارجع البيت بأكمل شغل على الكومبيوتر والنت وبالعافيه بأنام كام ساعه ..... مفروض إني أسيب ده كله وأسيب الدوامه دي وأسألها يحيى رضع كام مره النهارده ؟ ستات رااااايقه !!!

قالت ساره :

أجازتي من شغلي انتهت وكان لازم أرجع وإلا يستغنوا عن خدماتي ويجيبوا حد تاني ... وكان قرار صعب جداً إني أرجع ولا أقعد في البيت وخلاص .... كنت محتاره جداً في القرار والكل كان رأيه إني أتفرغ لتربيه يحيى وخلاص وأولهم عمر طبعاً !!!.... وأنا كنت حاسه إنها حاجه صعبه جداً ..... إني مش لاقيه وقت أخرج ولا أنام زى البني آدمين الطبيعيين لا وكمان أصحى بدري وأشتغل !!!....... وساعدت حاله الاكتئاب اللي كانت عندي - واللي الحمد لله انتهت بمرور الوقت وبتقربي إلى الله – ساعدت كمان إني ما يكونش عندي قدره إني اعمل أي حاجه تانيه ........ لكن بمرور الوقت أصبحت أفضل في رعاية يحيى وبقيت بأعرف هو بيبكي ليه وحاولت أنظم مواعيد رضعاته ....... فحسيت إني لازم أرجع أشتغل تاني وخصوصاً إني لا يمكن حالاقي وظيفه إني أشتغل من البيت تاني !! فصليت استخاره وحسيت إن ده مستقبلي حتى لو كان بسيط بس أنا مش عاوزه أكون زوجه و أم بس لأ لازم أكون قبل دول ......... ساره .... لازم أحافظ على شخصيتي وما أسيبهاش تدوب في دوامه البيت والأطفال ، حتى لو تعبت شويه لكن أكيد حاتعود ...... ولو ما تعبتش دلوقتي في شبابي حاتعب إمتى ؟ لكن الأيام الأولى كانت انتحار بجد طول الليل سهرانه مع يحيى وبينام بعد الفجر يادوب أصلي وأنام ساعتين وأصحى أقعد على الكومبيوتر وأبدأ في إرسال الايميلات والرد على العملاء بس طبعاً بامووووت من التعب وأحياناً كنت بأنام وأنا قاعده وأصحى مفزوعه من صوت التنبيه في الرسايل اللي بتوصل كل ثانيه !! وأفضل أشرب شاي وقهوه لحد ما أفوق وفى خلال كل ده أرتب البيت بسرعه ...... ويحيى معايا طبعاً باعمل له كل طلباته بدون توقف ...... لحد ما ينتهي العمل الساعه 3 وباكون خلصت الغداء وباحاول أنيم يحيى وأنام جنبه ولو ساعه أو ساعتين وبعدها أصحى أستعد لحضور عمر الساعه 6 ........آآآآآآآآآه يا رب ساعدني !!
ساره .. ساره .. اصحي إنتي نايمه على الكنبه ؟!!
صحيت من النوم لقيت عمر واقف جنبي بيصحيني فرديت عليه وقولت :
إيه ده إيه ده ؟ إنت جيت إمتى يا عمر ؟ إحنا الصبح ولا بالليل ؟
عمر : الساعه 7 بالليل يا ساره .. قومي يا حبيبتي علشان ناكل أنا جعان جداً عاوز آكل بسرعه علشان ورايا شغل كتير .....
شعرت بصداع رهيب وأنا أحاول أن أقوم من مكاني .... واتضايقت لما وجدت عمر يسأل عن الأكل ولم يسأل على أنا أو يحيى ....... فرددت بعصبيه عليه : طيب اسأل عليا أنا وابنك قبل ما تسأل عن الأكل يا سيدي .
فتفاجأ عمر من رد فعلى العصبي ويبدو انه هو كمان كان مشحون على الآخر فرد بعصبيه :
هو إحنا مش حانخلص من الموال ده يا ساره ؟! كل يوم تتهميني إني مقصر في حقكم إنتي ويحيى ؟! يعنى ليا بيت تاني مثلاً بأهتم بيه ؟؟ وإنتي عارفه قد إيه الشغل الجديد متعب ، أعمل إيه يعنى ؟
فرددت بعناد : والله أنا مش باطلب منك تسيب شغلك وتقعد جنبنا .... بس على الأقل حاول تشاركني ولو نفسياً في تربيه يحيى .. ده إنت حتى بتنام في أوده تانيه ... لا أنا بجد تعبت وحاسه إني عايشه لوحدي .
فرد بصراخ : يادي النكد الأزلي ... مش حانخلص من السيره دي يا ساره ؟ طيب قولي لي ازاي أنام وطول الليل يحيى بيصرخ ؟ يعنى أروح الشغل مش نايم علشان أترفد ونقعد على باب السيده كلنا ؟ كده أبقى باشاركك نفسياً ؟!!
فصرخت أنا الأخرى : والله ما أعرفش هو مش ابني لوحدي حرام انك تسيبني لوحدي في كل حاجه كده ............
ففاجأني برده القاسي : والله إنتي اللي سايباني يا هانم !!....... قبل ما تتهميني بالتقصير شوفي نفسك الأول !!! إنتي اللي من يوم ما ولدتي مش مهتمه بنفسك و مش شايفه غير يحيى بس وناسيه إن ليكي زوج ...... وحتى ما بتسألنيش عملت إيه في الشغل ولا ليكي دعوه بيا خالص ... خلاص اتركنت على الرف من أول طفل ، أمال لما يبقوا اتنين تلاته حاتعملي إيه ؟ حاترميني في الشارع ولا إيه ؟
فذهلت من هجومه على وشعرت بانهيار تاااام ...... كل هذا المجهود الرهيب وأكون أنا المقصره ؟؟؟ فعلاً لا حدود لأنانيه الرجال ........ لم أقوى حتى على البكاء ولا الصراخ .. تجمدت الكلمات على لساني ، ونظرت إليه وكأني لم أره من قبل ....... وشعرت بدوار كبير وسمعت صوته وهو يناديني من مكان بعييييد ......ومادت الأرض بي وووو فقدت الوعي ............


********************

الى اللقاء مع الحلقه القادمه

يوميات بابا عمر وماما ساره


الحلقه السابعة


قالت ساره :

فتحت عيني بصعوبه شديده لأجد نفسي نائمه في سريري ويحيى نائم بجواري وعمر ينظر لي بقلق بالغ وبيده عده عطور يحاول إفاقتي بها ..... شعرت بصداع رهيب لم أشعر به من قبل وثقل شديد في رأسي ....... وتذكرت ما حدث فأغمضت عيني كي لا أري عمر وسالت دموعي ...... همس عمر وهو ممسكاً بيدي :
حمد لله علي السلامه يا حبيبتي ...... كده تقلقيني عليكي ده أنا كنت حاموت لما أغمي عليكي ............
أنا : ................. .
عمر : أنا آسف ......
أنا : ............ .
عمر : مليون آسف يا حبيبتي ..... بس أنا كنت راجع حاموت من التعب وكنت عاوز أرتاح شويه علشان ورايا شغل تاني ......... بجد أنا مشحون جداً يا ساره ومفتقد حبيبتي جنبي ...
فرددت عليه بصوت ضعيف : أنا كمان تعبانه أوي يا عمر ومحتاجاك معايا ...... مسئوليه الأمومه متعبه جداً ولازم يكون حد معايا وإنت من يوم ما ولدت وإنت بعيد عننا وحتى بتنام في أوده تانيه ...... حاسه إني وحيده جداً .... ده أنا بيتهيألي انك مش مبسوط إننا خلفنا يحيى !!!
فرد بانزعاج : إيه الجنان ده ؟؟!!!!!! لا اله إلا الله ..... ده أنا أموت لو بس أتجرح إنتي مجنونه يا ساره ؟
فرددت من بين دموعي : أمال إنت بعيد ليه ؟؟
فرد بحنان بالغ : والله غصب عني ... عاوز أثبت نفسي في الشغل الجديد إنتي عارفه إني لسه في فتره اختبار أول شهرين ..... معقول من أولها كده أنام في الخط وأروح مش فايق علشان يقولوا لي مع السلامه ؟
فرددت بعناد : طيب والحل ؟
عمر : يا ساره لازم تعرفي إن أهم حاجه في حياه الراجل هي شغله وأهم حاجه في حياه الست هي أولادها وبيتها وكل خناقات الدنيا بتيجي لما طرف من الاتنين بيفترض العكس من شريكه ...... إحنا الاتنين لازم نتعب علشان نربي ابننا أحسن تربيه .......
أنا : بس أنا تعبانه أوي يا عمر .....
عمر : خلاص يا ساره صدقيني حاحاول والله علي قد ما أقدر إني أساعدك اتفقنا ؟
فرددت برضا : اتفقنا ..........
وجاءت الأيام التاليه وكلي تصميم علي تنظيم حياتي وتغييرها لنشعر جميعا بالراحه وبدأت بأني استشرت طبيبه أطفال في نوم يحيى المتقطع وسهره بالليل وتعبي معه فردت عليا رد صدمني أنني أنا السبب !!! ..... يا ربي ناقص يقولوا إني سبب خرم الأوزون !!!!
وجاء توبيخ الطبيبه لي إن المفروض من أول أسبوع أن أحاول ألا أرضع يحيى بعد الساعه 12 مساءً حتى السادسه صباحاً كي ترتاح معدته وينام باستغراق طوال هذه المده ...... لأن الطفل مادام يستيقظ ليلاً ويجد أمه ترضعه كل مره سيستيقظ كل ساعه حتى لو لم يكن جوعان !! لكنه لو علم أنها لن ترضعه سيبكي أول يومين وبعدها لن يستيقظ طوال الليل !! طبعاً سمعت كلام الطبيبه وأنا فاتحه فمي علامة البلاهه ....... يعني كان ممكن أرتاح من الغلب ده كله ؟؟؟؟ يا رب ساعدني ........
وعزمت علي تنفيذ ما قالته الطبيبه بالحرف الواحد واخترت يوم الأربعاء مساءً ليكون الخميس والجمعه أجازه بعدها وبالفعل حاولت تنظيم رضعاته ولم أرضعه ليلاً ..... وبالطبع كانت استغاثاته دوليه وكان ناقص يقوم يتصل بالبوليس من الست المفتريه دي !! وكدت أضعف وأرضعه إلا إني صمدت وأنا أبكي من صراخه ...... وفي النهايه نام !! فعلاً الأطفال في غاية الذكاء عندما علم أن لا فائده من صراخه نام وأكيد بيقول في سره حسبي الله ونعم الوكيل ......... لكن بعد عده أيام من العذاب الحمد لله استسلم ولم يعد يستيقظ ليلاً وأصبحت أنام زي مخاليق ربنا ....... وبعد أسبوعين آخرين أقنعت عمر إن يحيى أصبح أليف ورجع ينام في أودتنا تاني .......... اقتنعت دلوقتي ليه ربنا عمل هجر الفراش وسيله من وسائل تأديب المرأه !!!!

قال عمر :

الحمد لله أخيرا انتهت فترة الاختبار في الشركه وأبدوا إعجابهم بنشاطي ومجهودي وأصبحت مهندس دائم في الشركه والأهم إني أخييييراً حاقبض مرتبي بعد فتره الاختبار المجانيييييه !! والله وحاتبقي غني يا واد يا عمر ومحدش حايعرف يكلمك .......
لازم بجد أكافئ ساره وأشتري لها هديه محترمه علي الغلب اللي شافته معايا .... أنا فعلاً كنت لا أطاق في الفتره اللي فاتت ...... مش عارف ليه الست ممكن تركز في كذا حاجه في نفس الوقت وتعملها كلها بكفاءه تلاقيها بتذاكر لابنها وبتتفرج علي التليفزيون وتتكلم في التليفون وبتطرز مفرش في ايديها ومتابعه بقيه ولادها وهما بيلعبوا !! والراجل لو بس بيتكلم في التليفون وحد علي صوته ولا حاجه بيعمل حريقه في البيت لأنه مش مركز في المكالمه !! أنا فعلاً لما باركز في شغلي مش بأعرف أعمل أي حاجه تانيه .......... بس خلاص بقي فترة الضغط الرهيب دي عدت علي خير ولازم أعوض ساره ويحيى باشا ...........

قالت ساره :

إيه كل ده يا عمر ؟؟؟!! مش معقول ؟ إنت قتلت حد ولا إيه ؟
قلت هذه العباره باستغراب شديد وأنا أجد عمر يدخل البيت ومعه سرير هزاز جميل لـيحيى مزود بألعاب تصدر أصواتاً لإسكاته .... ومجموعه من الألعاب المطاطيه وكذا طقم خروج لـيحيى شيك جداً ...........
ولم أنتظر لحظه إلا وفاجأني بفستان سواريه لي في غاية الأناقه ......... قفزت من الفرحه وأنا أشكره وأقول له :
ده كتير أوي يا حبيبي ....... إنت قبضت ولا إيه ؟
رد عليا بفرح : ايوه يا قمر قبضت أخيييراً وكمان اخدت مكافأه شهور الاختبار ..... يعني باختصار أنا حالياً إنسان غني أوي وإنتي مش من مستوايا واحتمال ما أردش عليكي بسهوله !!
وطبعاً كان جزاؤه ضربه بكل مخدات الأنتريه وهو يصرخ ويطلب الرحمه ولم أتوقف عن ضربه إلا عندما فوجئنا أنا وعمر بصوت يحيى يضحك بصوت مسموع علي معركتنا أنا وأبيه ...... فجرينا نحوه واحتضناه ونحن لا نصدق آذاننا وأخذنا نضحكه أكثر وأكثر بافتعال الحركات المضحكه وهو يزداد في ضحكاته العاليه ...... واحتضننا عمر بسعاده بالغه وطلب مني أن أرتدي الفستان الجديد ويحيى الملابس الجديده لأننا سنخرج للعشاء في أشيك مطعم علي النيل ............
وجريت علي الفور لنلبس أنا ويحيى قبل أن يرجع في كلامه !! وكان شكل يحيى قمر في البدله الجديده التي جعلته مثل الرجل الصغير !! واهتممت جداً بمظهري وأخذت وقت طويل في الاستعداد وخرجت لـعمر ..........
عندما رآني عمر قال : اوووووه ما شاء الله ....... الآنسه مرتبطه ؟!!!
أنا : .............. .
عمر : طيب تسمح الآنسه القمر دي أني أعاكسها وأديها هديه تليق بالشياكه دي كلها ؟
وأخرج من جيبه علبه قطيفه بها اسوره رااائعه وألبسها لي وهو يقول :
ربنا يقدرني وأعوضك كل حاجه يا غاليه .....


********************

الى اللقاء مع الحلقه القادمه

يوميات بابا عمر وماما ساره


الحلقه الثامنة


قالت ساره :

لا أصدق إن مر علي ولادة يحيى 9 أشهر !!! وكأني كنت أحمله داخل رحمي بالأمس .. أصبح إنسان آخر زاد وزنه وأصبح شديد الشبه بي وفي خده غمازه تظهر بشده عندما يضحك .... بدأ يحبو علي الأرض ويضحك بشده عندما ألاعبه وعندما أجري وراءه يحبو بأقصى سرعته ليختبأ تحت الكنبه ويتخيل إني لا أراه !! ومتعلق بي بشكل لا يوصف وعندما يجد أي شيء ملقي علي الأرض لا يتردد أن يتذوقه أولاً وان لم يعجبه يعطيه لي بنفس راضيه !!!! مما جعلني طوال اليوم لا هم لي إلا أن أجعل الأرض خاليه ونظيفه ولا شيء عليها علي الإطلاق لأنه لا يفرق بين المسامير والحلوى كله إلى فمه !! مما يجعلني لا أهدأ طوال اليوم من التفتيش تحت أي كرسي يحلو له أن يختبئ تحته عن أي شيء ملقي ولو قطعه كلينكس خوفاً من أن يبتلعها .... مرحله خطيره جداً مرحله الحبو دي ربنا يستر وتعدي علي خير من غير ما عمر يطلقني !! لأنه لو وجد أي شيء ولو بنسه شعر سقطت مني تتحول إلى خناقه كبيره خوفاً علي حياة الباشا !!

قال عمر :

ياااه علي الروتين والشغل اللي ما بيرحمش أنا بجد تعبت خلاص ....... نفسي أخد أجازه وأروح في مكان فااااضي لا أري أي أحد علي الإطلاق ...... قدمت علي أجازه أسبوع وبالعافيه رضيوا علي 4 أيام فقط منهم الجمعه والسبت طبعاً !! بس مش مهم ، المهم إني اتخنقت وعاوز تغيير حالاً وساره كمان مطحونه بين شغلها وبين يحيى اللي أصبح عفريت وعاوز حارس عليه 24 ساعه كي لا يبتلع سم فيران مثلاً !! كلمت صديق قديم لي يمتلك شاليه منعزل علي شاطئ البحر الأحمر بعييييييد عن كل العالم .... الظاهر إنهم بنوه علشان يقتلوا فيه حد وبعدين غيروا رأيهم ..... هو شاليه يجنن علي شاطئ البحر مباشره في منطقه منعزله تماماً تبعد عن أي مباني حوالي 30 كيلو وهو ده اللي أنا عاوزه بالظبط ........

قالت ساره :

أهلاً أهلاً بالأستاذ يحيى أخبار مغامرات سعادتك إيه النهارده ؟
قالها عمر وهو يحتضن يحيى الذي هلل لرؤيته وأخذ يقفز بين ذراعيه .........
أنا : أسكت يا عمر ده جننني النهارده طول النهار مستخبي وبادور عليه يا إما تحت السفره يا إما جوه دولاب المطبخ بيلعب في الحلل !! إنت أكيد كنت جن زيه كده وإنت صغير وهو طالع لك .
ضحك بقوه وأجاب : أيوه كده خليه راجل امال عاوزاه بنوته ؟ أما أنا محضر لك حته مفاجأه تحفففففففه .........
قفزت من الفرح وأنا أسمع وأمسكته من رقبته : مفاجأه ؟ إيه يالا قول بسرررعه أحسن مش حايحصل لك طيب !!
عمر : يا ساتر يا رب !! هو ده الرد ؟ علي العموم أنا حاقول لـيحيى مش ليكي : بص يا كابتن أنا عارف انك ما شوفتش بحر قبل كده علشان كده يالا روح هات المايوه بتاعك علشان حانروح شاليه يجنن أنا وإنت بس وحانسيب ماما المفتريه دي هنا .......
وكأن يحيى فهم الكلام انه مطلوب منه شيء فأخذ يحبو بسرعه وذهب يحضر الدبدوب المفضل عنده واعطاه لأبيه وظهرت علامات الحيره علي وجهه عندما غرقنا في الضحك من تصرفه وكأنه يقول في سره : العالم دي مجانين ولا إيه النظام ؟ !!
أنا : شاليه إيه يا عمر ؟ إيه ده صاحبك وافق ؟ الشاليه بتاع البحر الأحمر ؟!
فرد في نشوه : أيوه يا ساره 3 أيام ما نشوفش ولا مخلوق السماء والبحر والهدوووووووء ........
فتحرك القلق داخلي لا اعرف له سبباً وقلت له : هي طبعاً حاجه مغريه جداً بس مش يمكن نحتاج حاجه ولا تحصل مشكله هناك ؟
فرد بتبرم : إنتي علي طول متشائمه كده يا بنتي ؟ حايحصل إيه يعني ؟ العفاريت حاياكلونا ؟ الشاليه مجهز بكل حاجه وحناخد كل أكلنا معانا حايحصل إيه يعني ؟ يالا حضري كل لوازمنا علشان نلحق نوصل الطريق طويل .........
********************
وأخييييراً وصلنا مع أول خيوط للفجر المكان منعزل عن العالم ولكنه ساحر ...... شاليه رائع من طابقين مبني علي الطراز الانجليزي وتحيطه حديقه صغيره ومطل علي البحر الذي لم أر في صفاء مياهه من قبل ودرجاته الفيروزيه والزرقاء التي تجعلك تسبح لله كل لحظه من فرط روعته ........ وفي الداخل وجدناه مؤسس بذوق راقي وبسيط يجعلك تشعر بالراحه من أول لحظه ... ونسمات البحر الرائعه تغسل عنا تعب العمل وارهاقه وتوقظ المشاعر التي خنقتها الروتين والرتابه ........ أفرغت الحقائب بسرعه وصلينا الفجر أنا وعمر ولم نستطع النوم فتسللنا وتركنا يحيى نائماً وجلسنا علي الرمال الناعمه نراقب الشروق وأشعة الشمس الوليده التي تعانق الأمواج علي استحياء وكأنها عروس خجلى ...... نظر لي عمر نظره لم أرها من شهور من فرط انشغالنا في العمل والمسئوليات .... وقال لي : بحبك !!!

قال عمر :

يا سلام لو الواحد يعيش كده طول عمره .... يااه أعصابي رايقه جداً وساره في قمة السعاده وهي تحاول أن تبلل أرجل يحيى في مياه البحر وهو خائف وينظر لهذا الشيء الخرافي الذي يراه لأول مره وكأنه يقول : البتاع ده ما شوفتوش في البيت عندنا قبل كده !!! ثم بعد فتره تعجبه اللعبه ويحرك يديه وقدميه بكل قوه حتى يغرق أمه وهي تهدده بانتقامها !!

قالت ساره :

مرت علينا أمسيه هادئه ونحن ننعم بالهدوء والصفاء ولم يكدرني سوي إني لاحظت إن يحيى يرفض الطعام منذ عده ساعات ....... وبعد فتره وجدته يصرخ ويبكي بلا انقطاع حاول عمر طمأنتي انه من تغيير الجو ..... حاولت تصديق هذا وأعطيته دواء للمغص ولكنه لم يستقر في معدته لدقائق وتقيئه بشكل أفزعني ...... ولم تمضي إلا ساعه ووجدت لديه إسهال رهيب والقيء لا ينقطع وحرارته مرتفعه جداً ....... صرخت علي عمر الذي ارتبك ولم يدري ماذا يفعل !! مرض يحيى من قبل عده مرات .... ولكنه أبداً لم يكن بمثل هذه الشده الرهيبه ... نظرت إليه وهو تقريباً مغشي عليه من فرط السوائل التي فقدها بشكل مفاجئ ..... ارتجفت ولم تحملني قدماي وبكي عمر وهو يرتدي ملابسه بسرعه لنذهب لأقرب طبيب ....... ولكن أين الطبيب في هذا المكان المنعزل وفي هذا الوقت من السنه والذي لم يبدأ فيه موسم التصييف بعد فجميع القرى السياحيه – البعيده جداً – أيضا خاويه !!!!!!!!!

قال عمر :

جرينا علي السياره وساره تحمل يحيى وهو تقريباً فاقد الوعي وفي شده الذبول وأنا لا أعرف إلى أين أذهب ؟ ودموع ساره لا تتوقف وهي تردد كلمه واحده بمنتهي الوعيد :
إنت السبب أنا قلت لك بلاش المكان المقطوع ده .... . لو حصل حاجه لابني والله لأقتلك !!!!
وكأنه ليس ابني أنا الآخر ...... فعلاً الأنثى في الأصل أم ثم زوجه !!
مرت نحو ساعه ونصف وأنا أسير بلا هدي ولا أجد بشائر لأي مستشفي أو حتى عياده وأنا أصرخ داعياً الله أن يغيثنا ..... وكل لحظه يحيى يزداد ذبولاً وشحوباً ..... وساره يكاد قلبها يتوقف من فرط البكاء والدعاء ..... حتى أخيراً وجدنا نقطة إسعاف علي الطريق العام ويبدو أنها مهجوره فجرينا عليها فلم نجد إلا حجره واحده للكشف يبدو إن لم يدخلها مريض من أعوام ووجدنا ممرض نصف نائم قابلنا ببرود شديد ..... صرخنا به سائلين عن الطبيب فأخبرنا بلا مبالاه أنه ليس موجود !!
ولأول مره في حياتي أري ساره الوديعه تتحول إلى نمره شرسه مستعده للقتل في أي لحظه وصوتها يصل إلى عنان السماء وهي تصرخ في الممرض بشراسه :
لو في ظرف 5 دقايق ما جبتش الدكتور حالاً اقسم بالله العظيم لأقتلك بأيدي وأدفنك في الحته المقطوعه دي !!!
ويبدو إن الرجل ارتعب من غضبها الهائل وفر كالريح يوقظ الطبيب من سكن الأطباء ... وجاء لنجده طبيب صغير السن حديث التعيين .... لا اعرف كيف يضعون طبيب قليل التجربه في مكان وحده لا يجد من يعلمه ويكون مسئول بمفرده عن كل شيء !! وبدأ في الكشف علي يحيى وتعابير وجهه غير مطمئنه وبعد قليل أخبرنا أن الحاله محتمل أن تكون تسمم من ابتلاعه شيء فاسد أدت إلى حالة القيء والإسهال الشديدين والاهم الآن هو إنقاذه من حاله الجفاف الخطيره .........

قالت ساره :

هبط علينا كلامه كالصاعقه وأحسست برعب لم أشعر به في حياتي ..... هل سيموت يحيى ؟ توقف عقلي عن العمل وتوقفت الحياه عن دورانها حتى البكاء لا اقدر عليه ..... أنظر إليه وهو فاقد الوعي وشاحب شحوب الموتى ....... أكيد ابتلع شيء من الشاليه أو البحر في غفله مني .... بماذا تشعر الأم إذا مات ولدها ؟...... يا رب لم أستطع الحفاظ علي نعمتك فسامحني وأحفظها لي برحمتك وسلطانك .... يا رب .. يا رب .

قال عمر :

انطلقت بأقصى سرعه إلى الصيدليه للمره الألف لإحضار المحاليل والادويه التي يطلبها الطبيب كل ساعه .... يحيى يزداد ذبولاً ولا يستعيد وعيه من شدة الجفاف منذ 5 ساعات وساره لا تفارقه وكل المحاليل تخترق أوردته بلا فائده ...... يا رب لا أعرف كيف أدعوك في هذه المحنه قد أكون ارتكبت العديد من الذنوب ولا أستحق غفرانك ...... ولكن ارحم هذا الملاك من أجل أمه التي تفقد الحياه كل دقيقه جواره ........ ارحمه من أجلي فهو نبض قلبي وثمرة عمري ...... ظهرت أنوار نقطه الإسعاف أمامي ... أخاف أن أقترب فيأتيني الخبر الذي أهرب من سماعه ...... يا رب .. يا رب .
وقبل أن أصل وجدت رجل عجوز مسكين ينام علي جانب الطريق ...... لا أعرف من أين جاء في هذا المكان ، ولا أعرف من أين جاءني هذا الخاطر فأوقفت السياره وأنا في أمس الحاجه لكل دقيقه .... نزلت وأعطيته كل المال الذي في جيبي بدون أن أبقي معي شيء و بدون تفكير .... تذكرت ( داووا مرضاكم بالصدقه ) لعل الله ينقذ ابني الوحيد ........
اقتربت وأنا أخشي أن أري وجوه باكيه في انتظاري .... ولكني وجدت ساره تهرول في اتجاهي وصوتها مختلط بين البكاء وعدم التصديق وهي تهتف :
يحيى فاق يا عمر !!!!!!


********************

الى اللقاء مع الحلقه القادمه

يوميات بابا عمر وماما ساره


الحلقه التاسعة


قالت ساره :

تحول كل بيتنا إلي فوضى منذ أن أصبح يحيى يمشي .... أصبح لا يوجد مقعد في مكانه ولا مفرش فوق ترابيزه لا سمح الله !! وطبعاً أي ورود أو تحف صغيره أصبح من المستحيل بقائها مكانها وأصبح مكانها الوحيد فوق الدولاب كي أنقذها من التحطيم المستمر !! ..... لا أعرف لماذا يحب الأطفال استكشاف كل شيء حتى لو رأوه مائه مره ؟ أتعجب عندما أري يحيى ماشياً في أمان الله وفجأه يثبت نظره في اتجاه شيء معين وهنا تصفر صفارات الإنذار في رأسي من أني في ثواني سأسمع صوت تحطيم أو دمار ..... ثم أجده متجهاً بمشيته التي تشبه مشية البطه إلى هدفه كالصاروخ ويكون غالباً كوب أو برواز صوره أو أي شيء ..... وهنا أقفز مثل لاعبي السيرك لأنقذ الهدف المسكين من مصيره المحتوم وان نجحت تبدأ مرحله من الصراخ من يحيى احتجاجاً علي هذا الظلم البائن !! كنت في البدايه أرق لبكائه وأتراجع عن موقفي كي يكف عن البكاء ....... ولكني وجدت انه في غاية الخبث علم أن البكاء يخيفني فاستخدمه كسلاح .... أي شيء يريده بفتح السارينه !! ولكني انتبهت لهذا السلاح الجديد وأصبحت لا أهتم لصراخه ... حتى عرف بعد فتره انه لا جدوى معي من البكاء فأصبح ينصرف عني وكأنه يتمتم ( حسبي الله ونعم الوكيل !! ) .......
أصبح يحيى هو صديقي الوحيد والوجه الوحيد الذي أراه يبتسم في وجهي منذ أن زارنا الحزن وأقام لدينا منذ شهرين ........ من يوم وفاة والد عمر ونحن نسكن مع الحزن في كل لحظه ....... أخاف علي عمر من شده حزنه علي أبيه ...... أراه شارداً حزيناً .... أستيقظ فلا أجده بجوازي وأجده يصلي وحيداً وهو يبكي لله ويسأله الصبر علي الفراق ............ أحاول بكل طاقتي أن أخرجه مما هو فيه بلا جدوى ...... يا رب خفف عنه وعنا ...........

قال عمر :

لا يعلم جنود ربك إلا هو ..... الموت من جنود الله التي تدفعنا دفعاً إلى الخوف من الوقوف بين يدي الله ....... لا أعرف كيف اختطف الموت أبي لأتحول فجأه من رجل إلى طفل صغير فقد يد أبيه في الزحام فوقف يبكي ولا يشعر بزحام الدنيا من حوله ...... فقط ينتظر وجه أبيه ليعيد له الأمان ...... رحمك الله يا أبي كم أتعبتك في طفولتي .... وكم عاندتك في مراهقتي ....... وكم جادلتك في شبابي ........ أندم علي كل يوم لم أقبل به يديك ........
وتبقي مشكله أمي ..... أنا ابنها الوحيد الرجل وأخواتي البنات متزوجات وفي بلاد بعيده مع أزواجهن ....... وأمي في حال يرثى لها منذ وفاة أبي .... وأنا يومياً أزورها بعد عملي وهي تعيش في أحزانها وتهمل حتى صحتها ....... خوفي عليها يزداد ولكن ماذا أفعل ؟

قالت ساره :

حياتنا انقلبت منذ وفاة والد عمر أصبحت لا أرى عمر إلا نادراً .... أصبح يخرج من عمله يذهب إلى حماتي ليقضي معها بقية الليل وأحيانا يبات هناك معها ...... وأنا أزورها ثلاث أو أربع مرات في الأسبوع ..... أعد طعام الغداء وأصطحب يحيى وأذهب لها وننتظر عمر ليأتي ونقضي بقية اليوم معها ...... أشفق عليها من أحزانها ....... لا أعرف كيف تشعر المرأه لو فقدت شريك حياتها وحبيبها ورجلها الوحيد بعد عشره أكثر من ثلاثين عاما ؟؟؟ وقد تحول حزنها إلى عصبيه شديده لو غاب عنها عمر يوماً تظل تبكي وتتهمه بأنه لا يحبها ويفضل بيته وزوجته ( اللي هي أنا ! ) عنها ...... ولو لم أحضر لها يحيى لتراه انصبت فوق رأسي كل صراخ الدنيا ..... ازدادت أعصابي توتراً وأصبحت تقريباً لا أنام وبيتي فقد الاستقرار ولا أرى زوجي ...... ولا أستطيع أن انطق بكلمه .... بل علي طول الوقت أن احتمل أعصاب عمر المنهاره وغضب حماتي طوال الوقت ..........
زارتني ماما ورأتني وأنا ذابله مجهده وقصصت عليها ما أنا فيه .... فردت علي :
معلش يا ساره استحملي ... جوزك معذور ده برضه والده .
أنا : أنا عارفه يا ماما والله ونفسي أخرجه من اللي هو فيه ...... ومستحمله عصبيته واكتئابه ...... بس حاسه إني عايشه في دوامه يادوب أصحى الصبح علشان اشتغل وأجهز الأكل وأشيله وآخد يحيى وأروح لحماتي ونقضي بقية اليوم عندها وطول الوقت باستحمل كلام في منتهي الغلاسه وكأنها عاوزه تقول لي ( أنا جوزي مات وإنتي كمان واخده ابني ؟ ) بجد يا ماما تعبت ومش عارفه اعمل إيه ؟
ماما : معلش أهم يومين ويعدوا يا ساره خليكي إنتي بنت الأصول اللي تقف جنب جوزها وأمه في الظروف دي ...... يعني لو كنت إنتي مكانه مش كان حايعمل كده ؟
أنا : مش باين يا ماما إنهم يومين ...... إحنا بقالنا شهرين علي الحال ده وعمر مش عاوز يسيبها لوحدها أبداً وبصراحه عنده حق بس أنا تعبت أعمل إيه ؟
فسكتت ماما للحظات وكأنها تفكر في أمر عميق وأجابتني : بصي يا ساره خلينا واقعيين أنا رأيي انك تقولي لـعمر يجيب والدته تقعد معاكي هنا ..........
فانتفضت كالملسوعه : إيه تعيش معايا هنا ؟ إنتي بتقولي إيه يا ماما ؟ هو إنتي مش عارفه طبعها وازاي بتعاملني ؟ حرام عليكي !!
ماما : بصي يا ساره خليكي عاقله ..... مش معقول حاتفضلوا علي الحال ده ومش ممكن حاتقولي له ارمي أمك ..... علشان ربنا يبارك لك في يحيى ..... وبعدين خليها تيجي منك أحسن لأن ده إن آجلاً أو عاجلاً حايحصل وهو اللي حايطلب منك إنها تعيش معاكم لأنه ابنها الوحيد الرجل ...... يعني هاتيها منك واعرضي عليه إنتي واحتسبيها عند ربنا ........
فسالت دموعي وأنا أري أن كلام أمي منطقي جداً ولا مفر منه : بس يا ماما كده حانبقي طول اليوم في حرب ...... وأكيد حاتحصل مشاكل ....... أعمل إيه ؟
ماما : والله اتكلي علي الله ومادمتي بتعملي كده علشان ترضي ربنا وتريحي جوزك يبقي أكيد عمر ربنا ما حايسيبك أبداً إن شاء الله .
صليت استخاره ودعوت الله وقلبي يمتلأ بالخوف من حياتي التي ستقلب رأساً علي عقب ......... وبكيت بين يدي الله وأنا أسأله العون ....... واقتربت من عمر وهو جالس وحده في الصالون شارد النظرات ...... وهمست له :
مش تروق كده يا حبيبي ..... ده إنت تعرف ربنا وربنا يرحمه إن شاء الله ..........
عمر : ونعم بالله يا ساره وهو حايفضل غالي علي طول ............ بس كل ما افتكر والدتي إنها لوحدها في الشقه وإنها ممكن يحصل لها حاجه من غير ما أكون معاها باتجنن .... نفسي أكون معاها علي طول علشان بالي يرتاح ........
فهمست في سري ( والله عند حق يا ماما خليها تيجي مني أحسن !! ) ورددت عليه :
ربنا يخليهالك يا رب ....... طيب أنا عندي اقتراح علشان تطمن عليها إيه رأيك تيجي تعيش معانا هنا وأنا أحطها جوه عيني ......... إيه رأيك ؟
فصرخ فرحاً ورأيت ابتسامته التي لم أرها من شهور وهو غير مصدق وقال لي : إيه بتقولي إيه ؟ إنتي بتتكلمي بجد يا ساره ؟ أنا كان نفسي أعرض عليكي الموضوع ده بس كنت متردد ...........
فبلعت توتري وابتسمت له وقلت : ليه بتقول كده يا عمر هو إحنا يعني حانرمي أهالينا ؟ ربنا يخليهالك ويقدرني علي خدمتها ........
فاحتضنني في قوه وهو يقول لي : بجد مش عارف أقول لك إيه يا ساره إنتي فعلاً بنت أصول ....... أنا عارف إن ماما متعبه شويه .... بس صدقيني إن شاء الله مش حاتضايقك خاااالص .............
وتركني وانطلق إلى التليفون يزف البشري لوالدته ....
وأنا أردد وأنا أكاد أبكي : خالص خالص خاااااااااااااااااااااااااااااااااالص !!!!!!!!!!!!


********************

الى اللقاء مع الحلقه القادمه